Esta primera entrada surde de tornar un pequeñu trabayu que fice en 4º la ESO pa una profesora de bioloxía que nun m'entendía cuando-y dicía que nun tolos mamíferos carnívoros yeren carnívoros según la taxonomía. Espero que podáis deprender daqué y que paséis una llectura prestosa.
Ye por toos conocío que son carnívoros animales como'l lleón o'l llobu: sentímoslo nos documentales o lleémoslo nes revistes ya enciclopedies. La pallabra "carnívoru" provién del llatín y significa lliteralmente "que come carne". Sicasí, esti términu poseye dos significaos relevantes na bioloxía que puen llevanos al error (y de fechu, fainlo davezu) si nun s'aclaren dende un entamu. De siguío defino de manera cenciella cada aceición y esplico cuatro coses de caún.
Carnívoru: organismu que s'alimenta principalmente o puramente a traviés del consumu d'animales. Esta aceición úsase principalmente na nutrición animal y na ecoloxía. La carne (o texíu muscular) nun ye la única parte nutritiva d'una presa, pero teniendo en cuenta que ye una xeneralización, podríemos falar de "consumu de carne". Esisten un ensame d'animales carnívoros, pero según la so definición, tamién lo son dalgunes especies de plantes y de fongos (de los que espero falar otru día). El términu ye válidu tanto pa los animales que consiguen l'alimentu per aciu la depredación como pa los que lo faen per aciu'l consumu carroña. Esisten axetivos más específicos pa referise a animales que s'alimenten de tipos específicos de preses. D'esta mena, por exemplu, al animal que s'alimenta d'inseutos lu nomamos insectívoru y al que s'alimenta de pexes, piscívoru.
Dionaea ye un xéneru de plantes carnívores. Consigue parte de los nutrientes que necesita de los pequeños animales qu'atrai hasta les sos "boques".
L'andarina (Hirundo rustica) aliméntase d'inseutos que caza mientres esnala, por eso, dicimos que ye un animal insectívoru.
Carnívoru: taxón de mamíferos placentarios. Ye dicir, l'orde Carnivora. Esti cláu inclúi delles especies que pertenecen a una llinia evolutiva d'animales adaptaos a la inxestión y dixestión principalmente de carne. Suponse que l'ancestru común a estos animales (tan estremaos como gatos, osos y foques) tenía la carne como elementu habitual na so dieta y poseyía adaptaciones propies pal so consumu. Esti conceptu foi utilizáu por primera vegada por Linneo, fundador de la taxonomía moderna, y ye, de fechu, el que causa más confusiones.
Creese que los mamíferos extinguíos de la familia Miacidae, como esti Tapocyon, son los miembros basales de l'orde Carnivora: l'ancestru común a tolos sos integrantes.
Los pinnípedos como esti llobu marín (Halichoerus grypus), clasificaos enantes nun orde estremáu (orde Pinnipedia), tan integraos agora nos carnívoros.
Si'l señor científicu-y hubiere dao otru nome a esti grupu d'animales nun tendríemos qu'aclarar el significáu de "carnívoru" cada vegada que lu utilizamos o, al contrario, tener que deducilu del so contestu cada vegada que lu lleemos. Lo mesmo fizo col orde Insectivora (güei en desusu), que clasificaba animales como'l corcuspín o'l topu. Pero Linneo ye Linneo, y lo que diz va a misa (anque vaya ganes d'enguedeyar les coses, Carl). Esta polisemia tan molesta ye lo que fai que n'ecoloxía los términos griegos referíos a l'alimentación seyan cada vegada más frecuentes y "los preferíos". Asina, un animal carnívoru sedría l'integráu nel taxón Carnivora y un animal zoófagu, el que s'alimenta d'animales, ensin duldes.
Munchos esperteyos como esti oreyón (Plecotus auritus) s'alimenten esclusivamente de preses vives, pero nun pertenecen a l'orde Carnivora.
L'osu panda (Ailuropoda melanoleuca) forma parte de l'orde Carnivora, pero la carne engloba menos del 1% de la so dieta.
Paezme necesario citar que, davezu, paez que'n munchos medios de comunicación (incluyendo dellos científicos) empleguen una variante de la primera aceición que describe a animales que s'alimenten d'unes preses específiques, xeneralmente, mamíferos, aves, reptiles y anfibios. Esto tien orixe nel entendimientu de "carnívoru" como'l significáu lliteral del términu ("que come carne") sumáu a l'usu comercial que se y-da a "carne", distinguiéndola de "pescáu", por exemplu. Ye un conceutu coloquial, confusu y mal emplegáu. D'esta mena, sedríen falses delles frases abondo sentíes en tolos idiomes como "El romu ye'l carnívoru más grande del planeta", cuando esti sedría la ballena azul. Nesti casu, el mayor animal de la Tierra taba siendo escartáu de ser carnívoru por ser un inofensivu comedor de krill y pexes pequeños, pero sigue alimentándose d'animales, ¿nun ye asina?
La ballena azul (Balaenoptera musuculus) y el romu (Physeter macrocephalus) son dos de los animales más grandes qu'esisten y los dos son puramente carnívoros, solo que les preses del segundu suelen ser unes 100.000 vegaes más grandes.
El catasol (Coccinella septempunctata) ye otru animal carnívoru estrictu.
